اسلام آباد ہائی کورٹ نے 5 سال سے لاپتہ شہری کی بازیابی کے لیے دائر درخواست کی سماعت کرتے ہوئے ریمارکس دیئے ہیں کہ اس کی وفاقی حکومت ذمے دار ہے تو کیوں نہ وزیرِ اعظم اور وفاقی کابینہ کو جرمانہ کیا جائے؟

اسلام آباد ہائی کورٹ نے 5 سال سے لاپتہ شہری کی بازیابی کے لیے دائر درخواست پر سیکریٹری داخلہ اور سیکریٹری دفاع کو نوٹس جاری کر دیئے، عدالت نے فیصلے پر عمل درآمد رپورٹ جمع کرانے کی ہدایت بھی کی۔

Table of Contents

x
Advertisement

اسلام آباد ہائی کورٹ نے ریمارکس دیئے کہ آئین کے تحت چلنے والی سوسائٹی میں جبری گمشدگی کسی صورت برداشت نہیں، وفاقی حکومت ذمے دار ہے تو کیوں نہ وزیرِ اعظم اور وفاقی کابینہ کو جرمانہ کیا جائے؟

عدالتِ عالیہ نے کہا کہ اٹارنی جنرل عدالت کو مطمئن نہ کر سکے تو وزرائے اعظم اور کابینہ کو جرمانہ عائد کریں گے۔

عدالت نے مزید ریمارکس دیئے کہ جے آئی ٹی نے جبری گمشدگی کا کیس بتایا ہے، کسی پر تو ذمے داری عائد کرنی پڑے گی، جبری گمشدگی کمیشن بھی ایک مذاق ہے، جو ایجنسیز سے مل کر کام کرتا ہے۔

چیف جسٹس اسلام آباد ہائی کورٹ، جسٹس اطہر من اللّٰہ نے ریمارکس دیئے کہ شہریوں کی سیکیورٹی اور سیفٹی ریاست کی ذمے داری ہے۔

انہوں نے کہا کہ کسی بھی شہری کی جبری گمشدگی گھناؤنا جرم ہے، اگر کوئی بھی شہری لاپتہ ہو تو ریاست اس کی ذمے دار ہے، یہ نہ کہیں کہ ریاست کچھ نہیں کر سکتی۔

چیف جسٹس اسلام آباد ہائی کورٹ نے ڈپٹی اٹارنی جنرل کو مخاطب کرتے ہوئے کہا کہ صرف حفاظت نہیں بلکہ جو لاپتہ ہے اس کا پتہ لگانا بھی ریاست پر لازم ہے، بھلے وہ لائیو اسٹاک والوں نے اٹھایا ہو، پتہ تو چلے لاپتہ ہونے والا کہاں پر ہے؟

یہ بھی پڑھیے

ڈپٹی اٹارنی جنرل نے جواب دیا کہ اس وقت نوازشریف وزیرِاعظم تھے، کیوں نہ ان کے خلاف اور ان کے بعد آنے والوں کے خلاف کارروائی کی جائے۔

دورانِ سماعت سابق سیکریٹری داخلہ، سیکریٹری دفاع، سابق آئی جی اسلام آباد عدالت کے سامنے پیش ہوئے۔

اسلام آباد ہائی کورٹ نے 19 مئی2015ء سے لاپتہ شہری عمران خان کی بازیابی کے لیے دائر کی گئی درخواست پر سماعت 3 ہفتے کے لیے ملتوی کردی۔

قومی خبریں سے مزید