Categories
Breaking news

کراچی: آج ہلکی، کل تیز بارش کی نوید

—فائل فوٹو
—فائل فوٹو

محکمۂ موسمیات کے چیف میٹرولوجسٹ سردار سرفراز کا کہنا ہے کہ ملک کے سب سے بڑے شہر کراچی میں آج مطلع ابر آلود رہنے کا امکان ہے، جبکہ کل رات تیز بارش ہو سکتی ہے۔

انہوں نے بتایا کہ شہرِ قائد کراچی میں کل شام تک وقفے وقفے سے بوندا باندی اور معتدل بارش جاری رہنے اور رات میں تیز بارش ہونے کا امکان ہے۔

چیف میٹرولوجسٹ کے مطابق جمعے کی صبح مغربی ہواؤں کا سلسلہ سندھ سے نکل جانے کی توقع ہے۔

ان کا کہنا ہے کہ مغربی ہواؤں کا یہ سلسلہ ملک کے شمالی حصوں میں پہاڑوں پر برف باری کا باعث بن سکتا ہے۔

کراچی میں کہاں، کتنی بارش ہوئی؟

محکمۂ موسمیات نے گزشتہ 24 گھنٹوں کے دوران ملک کے سب سے بڑے شہر کراچی میں ہونے والی بارش کے اعداد و شمار جاری کر دیے۔

چیف میٹرولوجسٹ سردار سرفراز نے یہ بھی بتایا کہ مغربی ہواؤں کا ایک اور سلسلہ 17 یا 18 جنوری کو ایک بار پھر بلوچستان پر اثر انداز ہو سکتا ہے۔

واضح رہے کہ کراچی میں رات بھر وقفے وقفے سے تیز بارش ہوئی تاہم صبح ہونے پر بارش کا سلسلہ رک گیا، شہر بھر میں کہیں ہلکی اور کہیں تیز بارش سے موسم سرد ہو گیا۔

کئی سڑکوں پر بارش کا پانی جمع ہونے سے ٹریفک کی روانی متاثر ہوئی ہے، تاہم ٹریفک پولیس کا کہنا ہے کہ شہر میں ٹریفک کی روانی برقرار ہے۔

کراچی ٹریفک پولیس کے مطابق بارش کے پانی کی وجہ سے شہرِ قائد میں کہیں پر ٹریفک جام نہیں ہے۔

کراچی: صبح بارش رک گئی، موسم سرد، پانی سڑکوں پر جمع

کراچی میں رات بھر وقفے وقفے سے بارش ہوئی تاہم صبح ہونے پر بارش کا سلسلہ رک گیا، شہر بھر میں کہیں ہلکی اور کہیں تیز بارش سے موسم سرد ہو گیا۔

لیاقت آباد انڈر پاس میں اور حیدری مارکیٹ کے روڈ پر چند مقامات پر پانی جمع ہے۔

ایم اے جناح روڈ پر بھی چند مقامات پر اور نیپا پل پر بھی پانی جمع ہے، تاہم ٹریفک کی روانی برقرار ہے۔

دوسری جانب شہر کی مصروف ترین شارعِ فیصل پر بھی ٹریفک رواں دواں ہے۔

ادھر نارتھ کراچی، نیو کراچی، ناگن چورنگی کے علاقے میں سڑکوں پر کہیں کہیں پانی جمع ہے جبکہ کئی گلیوں میں پانی جمع ہونے سے مکینوں کی آمد و رفت متاثر ہو رہی ہے۔

قومی خبریں سے مزید

Original Article

Leave a Reply

Your email address will not be published.