چاہتا ہوں قوم پولیس کو پسند کرے: عمران خان

وزیرِ اعظم عمران خان کہتے ہیں کہ فوج سرحدوں کی محافظ، جبکہ پولیس شہریوں کی محافظ ہوتی ہے، میں چاہتا ہوں کہ قوم پولیس کو پسند کرے۔

اسلام آباد کی پولیس لائنز میں پاسنگ آؤٹ پریڈ کی تقریب سے وزیرِ اعظم عمران خان نے خطاب کرتے ہوئے کہا کہ جن سیاستدانوں نے غلط راستے سے پیسہ بنایا، وہ ان کے کسی کام نہ آیا۔

انہوں نے کہا کہ چوری کے پیسے کا کوئی فائدہ نہیں، یہ کسی کام نہیں آتا، بچوں کو والد کی چوری بچانے کے لیے جھوٹ بولنا پڑ رہا ہے۔

عمران خان کا کہنا ہے کہ قوم کی جان و مال کی حفاظت ہونے تک قوم ترقی نہیں کر سکتی، کے پی میں حکومت میں آئے تو پولیس کا مورال گرا ہوا تھا۔

انہوں نے کہا کہ پاکستان تحریکِ انصاف نے خیبر پختون خوامیں پولیس کو تبدیل کیا، میں نے کے پی کی پولیس کو تبدیل ہوتے دیکھا ہے۔

وزیرِ اعظم عمران خان کا کہنا ہے کہ کئی دفعہ آسان راستہ تباہی کا راستہ ہوتا ہے، سمجھتا ہوں کہ پولیس کو ملنےوالی تنخواہ کافی نہیں ہے۔

یہ بھی پڑھیے

انہوں نے کہا کہ پولیس کی تنخواہوں کے معاملے پر وزیرِ خزانہ عبدالحفیظ شیخ سے بات کروں گا، اسلام آباد پولیس کی تنخواہ پنجاب پولیس کے برابر کرنے پر غور کریں گے، اسلام آباد پولیس کے اہل کاروں کو بھی ہیلتھ کارڈ دیں گے۔

عمران خان نے مزید کہا کہ وزیرِاعظم ہاؤس کے 60 سے 70 فیصد اخراجات کم کیئے ہیں، پانچواں مہینہ ہے کہ کرنٹ اکاؤنٹ خسارہ سر پلس میں ہے۔

انہوں نے یہ بھی کہا کہ صرف سمندر پار پاکستانی ملک کو اٹھا سکتے ہیں، اوورسیز پاکستانیوں کو اعتماد نہیں کہ ان کی انویسٹمنٹ محفوظ رہے گی، ان کا اعتماد بڑھانے کے لیے پولیس کا بہت اہم کردار ہے۔

قومی خبریں سے مزید