سینیٹ الیکشن 2018 میں ووٹوں کی خرید و فروخت اور اس سے متعلق ویڈیو سوشل میڈیا پر آنے کے بعد وزیر قانون خیبرپختونخوا سلطان محمد نے وزارت سے استعفیٰ دے دیا۔

وزیر قانون سلطان محمد نے وزیراعلیٰ خیبرپختونخوا محمود خان کو اپنا استعفیٰ ارسال کردیا۔

Table of Contents

x
Advertisement

واضح رہے کہ 2018 میں سینیٹ الیکشن کے لیے خیبر پختونخوا کے ارکان اسمبلی کی خرید و فروخت کی ویڈیو منظر عام پر آئی ہے جس میں دیکھا جاسکتا ہے کہ ارکان کے پی اسمبلی کے سامنے نوٹوں کے انبار لگے ہیں اور پی ٹی آئی ارکان کو نوٹوں کے انبار دکھا کر خریدا جارہا ہے۔

خیال رہے کہ 2018 کی اس ویڈیو میں موجودہ وزیر قانون خیبر پختونخوا سلطان محمد خان بھی موجود ہیں۔

خرید و فروخت کی مبینہ ویڈیو منظر عام پر آنے کے بعد وزیراعظم عمران خان نے وزیر قانون کے پی سلطان محمد سے استعفیٰ لینے کا فیصلہ کیا تھا۔

تاہم اب اس معاملے میں تاذہ پیش رفت یہ سامنے آئی ہے کہ وزیر قانون خیبر پختون خوا سلطان محمد نے اپنا استعفیٰ وزیراعلیٰ کے پی کو جمع کروادیا۔

اس حوالے سے سلطان محمد کا اپنے استعفے میں کہنا تھا کہ سوشل میڈیا پر وائرل ویڈیو میں میرا نام بھی آیا ہے، اخلاقی طور پر اپنا استعفیٰ دے رہا ہوں۔

سلطان محمد نے وزیراعلیٰ کو مخاطب کرتے ہوئے کہا کہ آپ کی کابینہ میں کام کرنا میرے لیے اعزاز تھا، میں غیر مشروط طور پر ہر قسم کی انکوائری کے لیے تیار ہوں۔

انھوں نے یہ بھی کہا کہ پُر اعتماد ہوں کہ انصاف ہوگا اور میرا نام کلئیر ہوجائے گا۔

خیال رہے کہ پیپلز پارٹی کے سابق ایم پی اے محمد علی باچا رقم کا بنڈل پی ٹی آئی ارکان کو دیتے نظر آرہے ہیں۔

محمد علی باچا نے اس ویڈیو سے متعلق دلچسپ وضاحت دیتے ہوئے کہا ہے کہ وہ وہاں موجود نہیں تھے، اس ویڈیو ایڈٹ کیا گیا ہے۔

قومی خبریں سے مزید