وزیر اعظم عمران خان آٹیکل ون 40 اے پر عملدرآمد یقینی بنائیں، پی ایس پی

پاک سر زمین پارٹی نے وزیراعظم عمران خان سے انتخابی اصلاحات کے ساتھ ساتھ بلدیاتی حکومت کے لیے آٹیکل ون 40 اے پر عملدرآمد کو یقینی بنانے کا مطالبہ کردیا ہے ۔

کراچی پریس کلب میں پریس کانفرنس کرتے ہوئے سیکریٹری جنرل پاک سر زمین پارٹی حسان صابر نے کہا کہ ایوانوں میں جانے والے آئین پاکستان کو صرف حکومت بنانے کے لئے استعمال کرتے ہیں، ماضی کی اور موجودہ حکومتیں اس آئین کی پامالی کررہی ہیں۔

Table of Contents

x
Advertisement

انہوں نے کہاکہ آج یومیہ بنیادوں پر حکومت اور اپوزیشن پریس کانفرنس ہی کررہی ہیں، ہم نے گزشتہ چار سال سے مقامی حکومتوں کو بااختیار بنانے کی بات کی ہے، ہم آٹیکل ون 40 اے کا مکمل عملدرآمد چاہتے ہیں مگر چند خاندان اور سیاسی جماعتیں ایسا ہونے نہیں دے رہی۔

سیکریٹری جنرل پاک سر زمین پارٹی نے کہا کہ وزیراعظم عمران خان نے پریس کانفرنس کے ذریعے کہا کہ وہ الیکٹرورل ریفامرز کرنا چاہتے ہیں، حکومت کا کام صرف باتیں نہیں عملدرآمد ہونا چائیے ، لوگوں نے تبدیلی کے نام پر ووٹ دے دیا ہے، نچلی سطح کے لوگ اگر ایوانوں میں آئیں گے تو وہ نچلی سطح کے مسائل کی بات کریں گے۔

ان کاکہنا تھا کہ کیا وجہ ہے کہ کورونا وائرس پر وفاقی حکومت ،این سی او سی اور صوبائی حکومت کی پالیسی الگ الگ ہے۔

حسان صابر کاکہنا تھا کہ آج کی پریس کانفرنس کو ہمارا لیگل نوٹس سمجھیں، پاک سر زمین پارٹی اس معاملے پر عدالت جانے کے لئے تیار ہے۔

اس موقع پر سید حفیظ الدین نے کہا کہ سندھ حکومت کی مردم شماری پر خاموشی ہے، اس مسئلے پر فوری طور پر سندھ حکومت اور وفاقی حکومت کام کرے، جب دل چاہتا ہے کراچی میں نیا ضلع بنالیا جاتا ہے، حدبندی پر بھی بات کرنی ہوگی، وزیراعظم صرف باتیں کرتے ہیں۔

قومی خبریں سے مزید