پاکستان تحریکِ اسلامی (پی ٹی آئی) کے خلاف فارن فنڈنگ کیس کے فیصلے میں تاخیر کے خلاف اپوزیشن اتحاد پاکستان ڈیمو کریٹک موومنٹ (پی ڈی ایم) کی جانب سے آج اسلام آباد میں الیکشن کمیشن کے دفتر کے سامنے کیئے جانے والے احتجاج میں شرکت کرنے کے لیے مسلم لیگ نون کی نائب صدر اور سابق وزیرِ اعظم میاں نواز شریف کی صاحبزادی مریم نواز روانہ ہو گئیں۔

مریم نواز مری سے اسلام آباد روانہ ہوئی ہیں، وہ پہلے پی ڈی ایم کے سربراہ مولانا فضل الرحمٰن کی رہائش گاہ پہنچیں گی۔

Table of Contents

x
Advertisement

پی ڈی ایم رہنما مولانا فضل الرحمٰن کی رہائش گاہ پر جمع ہو کر ان کی قیادت میں ایک ساتھ شاہرہ دستورکے لیے روانہ ہوں گے۔

ادھر احتجاج کے لیے پی ڈی ایم میں شامل سیاسی جماعتوں کے کارکن الیکشن کمیشن کے باہر پہنچنا شروع ہو گئے۔

الیکشن کمیشن کے سامنے احتجاج کرنے کے لیے پی ڈی ایم میں شامل سیاسی جماعتوں کے کارکنوں کا قافلہ نوشہرہ کے رشکئی انٹر چینج سے اسلام آباد کے لیے روانہ ہو گیا۔

خیبر پختون خوا سے جے یو آئی ف اور مسلم لیگ نون کی ریلیوں کی اسلام آباد آمد کا سلسلہ جاری ہے، یہ ریلیاں موٹر وے اور جی ٹی روڈ سے اسلام آباد میں داخل ہو رہی ہیں۔

پاکستان پیپلز پارٹی کی ریلی مل پور سے روانہ ہوئی جس کی قیادت پیپلز پارٹی کے رہنما نیر بخاری اور فیصل کریم کنڈی کر رہے ہیں۔

ممبر قومی اسمبلی طاہرہ اورنگزیب کی قیادت میں خواتین کی ریلی نواز شریف پارک پہنچ گئی جہاں کارکنوں نے شرکاء کا استقبال کیا۔

دوسری جانب پی ڈی ایم رہنماؤں کے خطاب کے سلسلے میں کنٹینر کشمیر چوک پہنچا دیا گیا ہے۔

ادھر اپوزیشن اتحاد پاکستان ڈیموکریٹک موومنٹ (پی ڈی ایم) کی جانب سے وفاقی دارالحکومت اسلام آباد میں الیکشن کمیشن کے آفس کے باہر احتجاج کے سلسلے میں سیکیورٹی انتہائی سخت کر دی گئی ہے۔

اسلام آباد کے ریڈ زون میں سیکیورٹی ہائی الرٹ کر دی گئی ہے، جبکہ اس ضمن میں وزارتِ داخلہ میں کنٹرول روم قائم کر دیا گیا ہے۔

کنٹرول روم میں امن و امان کی صورتِ حال کی مانیٹرنگ کی جائے گی، ریڈ زون کے داخلی اور خارجی راستوں پر پولیس کی بھاری نفری تعینات ہو گی۔

یہ بھی پڑھیے

تمام اہم عمارتوں کی سیکیورٹی کے لیے پولیس اور رینجرز کے اضافی دستے تعینات کیئے گئے ہیں، اس سلسلے میں 1800 سے زائد پولیس جوان سیکیورٹی کے فرائض سر انجام دے رہے ہیں۔

سیف سٹی کے کیمروں کے ذریعے وفاقی دارالحکومت اسلام آباد کے ریڈ زون کی مانیٹرنگ کی جا رہی ہے۔

وزارتِ داخلہ کے ذرائع کے مطابق ریلی کے شرکاء کی طرف سے قانون شکنی کی صورت میں سخت ایکشن لیا جائے گا۔

ادھر آئی جی اسلام آباد نے الیکشن کمیشن کا دورہ کر کے سیکیورٹی کی صورتِ حال کا جائزہ لیا۔

قومی خبریں سے مزید