الیکشن کمیشن آف پاکستان نے نااہلی کیس کی سماعت کرتے ہوئے پاکستان تحریکِ انصاف کے رہنما و وفاقی وزیر فیصل واؤڈا کو اگلی سماعت پر ذاتی حیثیت میں طلب کر لیا جبکہ کیس کے بار بار التواء پر فیصل واؤڈا پر 50 ہزار روپے جرمانہ بھی عائد کر دیا۔

چیف الیکشن کمشنر سکندر سلطان راجہ کی سربراہی میں 5 رکنی بینچ نے سماعت کی۔

Table of Contents

x
Advertisement

دورانِ سماعت فیصل واؤڈا کے وکیل محمد بن محسن کمیشن کے سامنے پیش نہیں ہوئے۔

معاون وکیل حسنین علی چوہان نے بتایا کہ فیصل واؤڈا کے وکیل محمد بن محسن لاہور میں عدالت میں مصروف ہیں، لہٰذا آج کے لیے کیس سے التواء دیا جائے۔

الیکشن کمیشن نے فیصل واؤڈا کے وکیل کی جانب سے التواء کی درخواست پر اظہارِ برہمی کیا۔

ممبر الیکشن کمیشن الطاف ابراہیم قریشی نے کہا کہ کیس کی سماعت پر التواء مانگنے کا یہ کوئی طریقہ نہیں، آپ نے التواء کی درخواست کے ساتھ ثبوت نہیں لگایا کہ وکیل کہاں مصروف ہیں۔

انہوں نے مزید کہا کہ لاہور کی عدالت کا کیس، الیکشن کمیشن کے کیس سے منسلک نہیں ہے، فیصل واؤڈا کے وکیل کو لاہور کی عدالت کے ساتھ اپنا ٹائم مینج کرنا چاہیئے تھا۔

ممبر الیکشن کمیشن ارشاد قیصر نے معاون وکیل حسنین علی چوہان سے استفسار کیا کہ آپ پاور آف اٹارنی نہیں رکھتے، کس حیثیت سے عدالت میں آئے ہیں؟

معاون وکیل حسنین علی چوہان نے جواب دیا کہ ہم ساتھ کام کرتے ہیں، دوست کی حیثیت سے پیش ہوا ہوں۔

درخواست گزار قادر مندوخیل نے حسنین علی چوہان کو جواب دیا کہ آپ فیصل واؤڈا کے کراچی میں کوآرڈینیٹر ہیں۔

چیف الیکشن کمشنر سکندر سلطان راجہ نے کہا کہ فیصل واؤڈا کیس پہلے ہی بہت بار التواء کا شکار ہے، آج فیصل واؤڈا کے وکیل کو ہمارے سوالات کے جواب دینے تھے۔

انہوں نے کہا کہ پوچھا گیا تھا کہ فیصل واؤڈا نے کاغذاتِ نامزدگی میں دہری شہریت کے خانے میں ناقابلِ اطلاق کیوں لکھا، فیصل واؤڈا کے وکیل نے بیان دیا تھا کہ فیصل واؤڈا کے پاس غیر ملکی شہریت تھی، ہم نے سوال کیا تھا کہ فیصل واؤڈا نے دہری شہریت کب چھوڑی؟

یہ بھی پڑھیے

چیف الیکشن کمشنر نے کہا کہ جوابدہ کی جانب سے بار بار تاخیر الیکشن کمیشن کو قابلِ قبول نہیں، فیصل واؤڈا کے کیس میں مختصر مدت کے بعد دوبارہ سماعت کرتے ہیں، فیصل واؤڈا کیس میں 50 ہزار روپے کے اخراجات ادا کریں۔

انہوں نے مزید کہا کہ ہم نے درخواست گزار کی جانب سے درخواست کو مسترد کیا تھا، درخواست گزار کا مؤقف تھا کہ فیصل واؤڈا دہری شہریت سے متعلق امریکی قونصلیٹ کو لکھیں۔

چیف الیکشن کمشنر سکندر سلطان راجہ نے یہ بھی کہا کہ اگر جوابدہ نے مزید تاخیر کی تو آئندہ سماعت پر الیکشن کمیشن امریکی قونصلیٹ کو لکھے گا۔

الیکشن کمیشن نے حکم دیا کہ اگلی سماعت پر فیصل واؤڈا خود الیکشن کمیشن کے سامنے پیش ہوں، نیز وہ بار بار التواء پر 50 ہزار روپے اخراجات کا جرمانہ بھی ادا کریں۔

الیکشن کمیشن آف پاکستان نے فیصل واؤڈا کی نااہلی کے کیس کی سماعت 24 فروری تک ملتوی کر دی۔

قومی خبریں سے مزید