Categories
Breaking news

عمدہ کارکردگی پر حسن علی آئی سی سی پلیئر آف دی منتھ کیلئے نامزد

حسن علی

انٹرنیشنل کرکٹ کونسل (آئی سی سی) نے قومی فاسٹ باؤلر حسن علی کو مئی کے لیے نامزد بہترین کھلاڑیوں کی فہرست میں شامل کر لیا ہے۔

آئی سی سی کی جانب سے ہر ماہ چند کھلاڑیوں کو بہترین کھلاڑی کے ایوارڈ کے لیے نامزد کیا جاتا ہے اور اسی سلسلے میں مئی کے لیے چند کھلاڑیوں کو نامزد کیا گیا ہے۔

آئی سی سی نے مئی کے لیے اعلان کردہ مینز پلیئر آف دی منتھ کے لیے پاکستان کے حسن علی، سری لنکا کے جے وکرما اور بنگلہ دیش کے مشفیق الرحیم کو نامزد کیا ہے۔

حسن علی نے مئی میں زمبابوے کے خلاف دو ٹیسٹ سیریز میں شاندار کارکردگی کا مظاہرہ کرتے ہوئے 8.92 کی اوسط سے 14 وکٹیں حاصل کیں اور اسی کارکردگی کی وجہ سے انہیں آئی سی سی پلیئر آف دی منتھ کے لیے نامزد کیا گیا ہے۔

آئی سی سی ویمنز پلیئر آف دی منتھ کے لیے اسکاٹ لینڈ کی آل راؤنڈر کیتھرین برائس اور آئرلینڈ کی گیبی لیوئس کو نامزد کیا گیا ہے۔

شائقین کے ساتھ کرکٹ ماہرین کا پینل ووٹنگ کے ذریعے مئی کے مہینے کے لیے بہترین کھلاڑی کا انتخاب کرے گا۔

واضح رہے کہ گزشتہ ماہ قومی ٹیم کے کپتان بابر اعظم نے پلیئر آف دی منتھ کا اعزاز اپنے نام کیا تھا۔

بابر اعظم نے جنوبی افریقہ کے خلاف سیریز میں تمام فارمیٹس میں عمدہ کارکردگی کا مظاہرہ کیا تھا اور شائقین کے ساتھ ساتھ آئی سی سی ووٹنگ اکیڈمی نے اپریل کے مہینے کے لیے بابر اعظم کو بہترین کھلاڑی منتخب کیا تھا۔

Leave a Reply

Your email address will not be published. Required fields are marked *