شیخ رشید داخلہ، سواتی ریلوے،حفیظ شیخ خزانے کے وزیر

وفاقی کابینہ میں بڑے پیمانے پر رد و بدل کی گئی ہے، جس کے بعد وفاقی وزیر شیخ رشید سے وزارت ریلوے کا منصب لے کر وزیرِ داخلہ بنا دیا گیا ہے، ان کی جگہ وزارتِ ریلوے اعظم سواتی کو دے دی گئی ہے۔

اعجاز شاہ سے وزارتِ داخلہ کا قلم دان لے کر انہیں وزیرِ انسدادِ منشیات کا منصب دیا گیا ہے، اس سے پہلے وزارتِ انسدادِ منشیات کا قلم دان اعظم سواتی کے پاس تھا۔

دوسری جانب آج صبح وفاقی وزیر کا حلف اٹھانے والے عبدالحفیظ شیخ کو وفاقی وزیرِ خزانہ کا قلم دان دے دیا گیا ہے۔

عبدالحفیظ شیخ سے صدر مملکت ڈاکٹر عارف علوی نے ایوانِ صدر اسلام آباد میں منعقدہ تقریب میں حلف لیا۔

ذرائع کا کہنا ہے کہ حفیظ شیخ کے بعد مشیر تجارت عبدالرزاق داؤد اور معاونِ خصوصی برائے صحت ڈاکٹر فیصل سلطان کو بھی 6 ماہ کے لیے وفاقی وزیر بنانے کا امکان ہے۔

یہ بھی پڑھیے

ذرائع نے یہ بھی بتایا ہے کہ وزیرِ اعظم عمران خان آئین کے آرٹیکل 91 کے تحت کسی غیر منتخب شخص کو 6 ماہ کے لیے وفاقی وزیر مقرر کرسکتے ہیں۔

عبدالحفیظ شیخ، عبدالرزاق داؤد اور ڈاکٹر فیصل سلطان کو مارچ 2021ء میں سینیٹر بنائے جانے کا امکان ہے، سینیٹر منتخب ہونے کے بعد تینوں مشیر وفاقی وزیر بن سکتے ہیں۔

قومی خبریں سے مزید