Categories
Breaking news

شہر اقتدار اور دیگر شہروں میں اومی کورون نے پنجے گاڑ دیے

شہر اقتدار اور دیگر شہروں میں اومی کورون نے پنجے گاڑ دیےکراچی، لاہور اور اسلام آباد میں کورونا کے نئے ویرینٹ اومی کرون کے کیسز میں تیزی سے اضافہ دیکھنے میں آرہا ہے۔محکمہ صحت پنجاب کے مطابق صوبے میں مزید 24 افراد میں اومی کرون وائرس کی تصدیق ہوئی ہے جس سے پنجاب میں اومی کرون کیسز کی تعداد 177 ہوگئی ہے۔

محکمہ صحت کا بتانا ہےکہ گزشتہ روز لاہور میں مزید 20 افراد میں اومی کرون کی تصدیق ہوئی جس سے شہر میں اومی کرون کیسز کی تعداد 170 ہو گئی۔

دوسری جانب محکمہ صحت سندھ نے کراچی میں مزید 23 افراد میں اومی کرون وائرس کی تصدیق کی ہے۔

محکمہ صحت کے مطابق اومی کرون سے متاثرہ افراد کا تعلق ضلع شرقی، غربی، وسطی اور ملیر سے ہے۔

محکمہ صحت کا بتانا ہےکہ سندھ میں اومی کرون کیسز کی تعداد 200 ہوگئی ہے۔
ادھر وفاقی دارالحکومت اسلام آباد میں مزید 27 افراد میں اومی کرون کی تصدیق ہوئی ہے۔

ڈسٹرکٹ ہیلتھ آفیسر کے مطابق شہر میں اومی کرون سے متاثرہ افراد کی تعداد 141 ہوگئی ہے اور اومی کرون سے متاثرہ افراد کی اکثریت نے انسداد کورونا ویکسین نہیں لگوائی۔

ڈی ایچ او کے مطابق اسلام آباد میں پہلا اومی کرون کیس 25 دسمبر کو سامنے آیا تھا۔

واضح رہے کہ پاکستان میں کورونا وائرس کے کیسز میں تیزی سے اضافہ ہورہا ہے اور مثبت کیسز کی شرح 1.80 فیصد تک جا پہنچی ہے۔

این سی او سی کے سربراہ اسد عمر نے گزشتہ روز اپنے بیان میں کہا تھا کہ پاکستان میں کورونا کی پانچویں لہر کے واضح اثرات ہیں۔

Leave a Reply

Your email address will not be published.