حکومت نے کورونا ویکسین کیلئے 150 ملین ڈالرز مختص کردیے، ڈاکٹر فیصل سلطان

وزیراعظم عمران خان کے معاون خصوصی برائے صحت ڈاکٹر فیصل سلطان نے کہا ہے کہ کورونا ویکسین کی دستیابی کے لیے 150 ملین ڈالرز کی رقم مختص کردی گئی ہے۔

اسلام آباد میں صحافیوں سے گفتگو میں ڈاکٹر فیصل سلطان نے کہا کہ کورونا ویکسین کب اور کس کو لگے گی، اس کےلیے انفارمیشن سسٹم تیار کر رہے ہیں۔

Table of Contents

x
Advertisement

انہوں نے کہا کہ ویکسین کے حوالے سے فیصلہ سازی کےلیے 3 سینئر وزراء پر مشتمل کابینہ کمیٹی قائم کردی گئی ہے، آئندہ برس کی پہلی سہ ماہی میں پاکستان کو ویکسین کی فراہمی ممکن ہوسکے گی۔

وزیراعظم کے معاون خصوصی برائے صحت نے مزید کہا کہ نجی سیکٹر اپنی ویکسین رجسٹرڈ کروانا چاہیں تو رکاوٹ نہیں ڈالی جائے گی۔

ان کا کہنا تھا کہ کورونا رسک الاؤنس کے حوالے سے ڈاکٹرز کا گِلہ بالکل ٹھیک ہے، نرسک الاؤنس بڑے زبردست طریقے سے دیا جانا چاہیے تھا لیکن ایسا نہ ہوسکا۔

ڈاکٹر فیصل سلطان نے یہ بھی کہا کہ رسک الاؤنس کی شفاف فراہمی میں رکاوٹ پر پوشیدہ عناصر کا ذتی طور پر جائزہ لوں گا۔

انہوں نے کہا کہ ہیلتھ کارڈز کی سہولت تمام شہریوں کو میسر ہوگی، صحت کارڈز دینے کا فیصلہ مالی معاملات کو دیکھ کر کیا جارہا ہے۔

وزیراعظم کے معاون خصوصی نے کہا کہ ایم ٹی آئی کے نفاذ کو آلودہ کرنے کے لیے من گھڑت الزامات لگائےجا رہے ہیں، نئے اقدام کے نفاذ سے قبل شکوک و شبہات موجود ہوتے ہیں۔

ان کا کہنا تھا کہ ایم ٹی آئی کامقصد ون مین شو کے بجائے اختیارات پینل کو دیے جانا ہے، کوئی نجکاری نہیں کررہے ادارے حکومت کے ہی رہیں گے۔

ڈاکٹر فیصل سلطان نے مزید کہا کہ فیصلہ سازی کا اختیار وزارت کی بجائے بورڈ کو دیا جائے گا اور بورڈ کا چیئرمین اکاؤنٹس، لیگل یا کسی بھی سیکٹر سے ہوسکتا ہے، سرکار کی جانب سے گرانٹ کا سلسلہ جوں کا توں جاری رہے گا۔

قومی خبریں سے مزید