وزیرِ اعلیٰ پنجاب سردار عثمان بزدار نے ملتان کے نجی اسپتال میں غلط سرجری کے باعث 16 مریضوں کے بینائی سے محروم ہونے کے واقعے کا نوٹس لے لیا۔

وزیرِِاعلیٰ پنجاب سردار عثمان بزدار نے اس ضمن میں سیکریٹری صحت اور کمشنر ملتان ڈویژن سے رپورٹ طلب کر لی۔

وزیرِِاعلیٰ پنجاب نے ہدایت کی ہے کہ واقعے کی غیر جانبدارانہ تحقیقات کر کے رپورٹ پیش کی جائے، ذمے داروں کا تعین کر کے قانون کے مطابق کارروائی کی جائے۔

سردار عثمان بزدار نے یہ ہدایت بھی کی ہے کہ حقائق منظرِ عام پر لائے جائیں اور بینائی سے محروم افراد کی داد رسی کی جائے، ان کے علاج معالجے پر خصوصی توجہ دی جائے۔

دوسری جانب میڈیا پر معاملہ سامنے آنے پر وزیرِاعلیٰ کی ہدایت پر بنائی گئی 5 رکنی تحقیقاتی کمیٹی ملتان پہنچ گئی جس نے اسپتال کے عملے اور آپریشن کرنے والے آئی سرجن ڈاکٹر حسنین مشتاق کے بیان ریکارڈ کر لیئے۔

کمیٹی کی جانب سے آپریشن کے دوران استعمال ہونے والی دواؤں کو بھی قبضے میں لے لیا گیا ہے۔

یہ بھی پڑھیے

واضح رہے کہ ملتان کے نجی ٹرسٹ اسپتال میں ڈاکٹروں نے سنگین غفلت کا مظاہرہ کرتے ہوئے 16 افراد کی آنکھوں کا غلط آپریشن کر دیا گیا، جس کے باعث آپریشن کروانے والے مریض متاثرہ ایک ایک آنکھ کی بینائی سے محروم ہو گئے۔

نجی اسپتال میں 20 مارچ کو 7 خواتین سمیت 16 افراد کی ایک ایک آنکھ کا آپریشن کیا گیا تھا، آپریشن کے 2 گھنٹے بعد ہی تمام افراد آپریشن والی آنکھ کی بینائی سے محروم ہوگئے تھے۔

قومی خبریں سے مزید