ایم کیو ایم کا حکومت چھوڑنے سے متعلق عوام سے رجوع کرنے کا فیصلہ

متحدہ قومی موومنٹ (ایم کیو ایم) پاکستان نے وفاقی حکومت چھوڑنے سے متعلق عوام سے رجوع کرنے کا فیصلہ کرلیا ہے۔

کراچی میں پریس کانفرنس کے دوران ایم کیو ایم پاکستان کے سربراہ خالد مقبول صدیقی نے کہا کہ وفاقی حکومت میں ر ہنا ہے یا نہیں؟، اس سے متعلق ایم کیو ایم کا تنظیمی ڈھانچہ عوام کے پاس جائے گا۔

Table of Contents

x
Advertisement

انہوں نے کہا کہ حکومت کے سامنے تحفظات اور لائحہ رکھ دیا ہے، عوام کے پاس جاکر اگلے لائحہ عمل کی رائے لیں گے اور جلد حتمی فیصلہ کریں گے۔

خالد مقبول صدیقی نے دعویٰ سے کہا کہ ہمارا پہلا مطالبہ مردم شماری کی درستی ہے، کابینہ میں شامل ہونا ہمارا مطالبہ کبھی تھا ہی نہیں۔

ان کا کہنا تھا کہ پاکستان کے خزانے میں 60 سے 65 فیصد کراچی ڈالتا ہے، ہماری بات سنی جاتی ہے مگر اُس پر عمل درآمد نہیں ہوتا۔

ایم کیو ایم سربراہ نے کہا کہ ہمیں لگتا ہے کہ کراچی کے حوالے سے سیاسی جماعتوں، ریاست اور ریاستی اداروں میں خاموش اتفاق رائے پایا جاتا ہے۔

انہوں نے کہا کہ کراچی ٹوٹ رہا ہے، ڈوب رہا ہے، سندھ کے شہری علاقوں کو پیغام دیا گیا ہے کہ نوکریوں پر آپ کا کوئی حق نہیں۔

خالد مقبول صدیقی نے مزید کہا کہ ہم نے اولین مطالبہ سندھ کی شہریوں کی آبادی اور پاکستان کی بقا کے لیے کیا، کراچی 15 سالوں میں ایک بڑے دیہات کی شکل اختیار کرتا جارہا ہے۔

ان کا کہنا تھا کہ کابینہ میں فیصلے کے وقت ایم کیو ایم کے وزیر نے شدید احتجاج کیا، اولین مطالبہ اور نکتہ ہے، جس پر قائم رہیں گے۔

ایم کیو ایم سربراہ نے یہ بھی کہا کہ مردم شماری کے عوامی مطالبے پر عوام سے رجوع کرنےکا فیصلہ کیا ہے، گلی محلوں، ٹاؤنز میں جاکر اگلے لائحہ عمل پر عوام کی رائے معلوم کریں گے۔

انہوں نے کہا کہ جس شہر کے رہائشیوں کو ڈھائی کروڑ شناختی کارڈ جاری ہوچکے ہیں اس کی آبادی 1 کروڑ 60 لاکھ بتائی گئی ہے۔

خالد مقبول صدیقی نے دعویٰ کیا کہ مردم شماری کے کئی بلاکس میں آبادی زیرو دکھائی گئی ہے، عوام کے ساتھ کھڑے ہوکر کوئی حتمی فیصلہ بہت جلد کریں گے۔

ان کا کہنا تھا کہ حکومت آئینی آپشن لینے میں کیو ں تاخیر کررہی ہے، مشترکا مفادات کونسل نے 5 فیصد سیمپل کے آڈٹ کا فیصلہ کیا تھا، حکومت کے پاس قانون میں تبدیلی اور ترمیم کے تمام آپشن ہیں۔

ایم کیو ایم سربراہ نے کہا کہ 18ویں ترمیم کے نتیجے میں حکومت کا سب سے بڑا نشانہ سندھ کے شہری علاقے ہیں۔

قومی خبریں سے مزید