Categories
Breaking news

اپوزیشن کی جماعتوں میں نظریاتی ہم آہنگی نہیں ہے، شاہ محمود قریشی

شاہ محمود قریشی

وزیر خارجہ شاہ محمود قریشی نے کہا ہے کہ ملتان میں اپوزیشن کو جلسہ کرنا چاہیے تھا نہ انتظامیہ کو روکنے کی کوشش کرنی چاہیے تھی، کابینہ میں بھی اپوزیشن کو جلسوں سے نہ روکنے کا مشورہ دیا تھا۔

شاہ محمود قریشی نے کہا کہ اپوزیشن کو ملتان کے قاسم باغ میں جلسے کی اجازت ہونی چاہیے تھی، کنٹینر نہیں لگانے چاہیے تھے، اپوزیشن اسٹیڈیم چلے جاتی تو بے نقاب ہو جاتی۔

انھوں نے کہا کورونا تیزی سے پھیل رہا ہے، ملتان میں اپوزیشن کو جلسہ کرنا چاہیے تھا نہ انتظامیہ کو روکنے کی کوشش، کابینہ میں بھی اپوزیشن کو جلسوں سے نہ روکنے کا مشورہ دیا، ملتان میں کسی کی پکڑ دھکڑ میں کوئی کردار ادا نہیں کیا۔

وزیر خارجہ نے کہا کابینہ کے گزشتہ اجلاس میں میں نے اپنا مؤقف سامنے رکھا تھا، میں نے برملا کہا کہ اپوزیشن کی سرگرمیوں کو نہ روکیں بلکہ مشورہ دیں، یہاں کچھ لوگوں نے تاثر دیا کہ مجھے محدود کیاگیا، اللہ جانتا ہے کس نے کیا کردار ادا کیا ہے، میری سوچ کبھی غیر سیاسی، غیر جمہوری نہیں رہی۔

شاہ محمود نے کہا اپوزیشن کا یہ غیر فطری اور وقتی الائنس ہے، اپوزیشن کی جماعتوں میں نظریاتی ہم آہنگی نہیں ہے، یہ کنفیوژن کا شکار ہیں، اپوزیشن کو استعفے دینے ہیں تو کس نے روکا ہے دے دیں، پی ڈی ایم کا 8 دسمبر کو اجلاس ہے فیصلہ کریں اور استعفے دے دیں۔

خطے کی صورت حال پر تبصرہ کرتے ہوئے وزیر خارجہ نے کہا کہ افغان حکومت اور طالبان میں مذاکرات کی نوعیت پر اتفاق ہوا ہے، افغانستان میں امن عمل آگے بڑھ رہا ہے، پاکستان کے کردار کو نہ صرف دنیا بلکہ افغان قیادت بھی سراہ رہی ہے، ماضی میں افغانستان پاکستان پر انگلیاں اٹھاتا تھا، آج افغانستان نے 57 ممالک کے سامنے پاکستان کا شکریہ ادا کیا۔

Leave a Reply

Your email address will not be published. Required fields are marked *