اسلام آباد ہائی کورٹ حملے کی تحقیقات کے لیے پولیس نے جے آئی ٹی بنانے کا فیصلہ کر لیا ہے، چیف جسٹس اطہر من اللّٰہ نے ریمارکس دیئے کہ پولیس کے سینئر افسر کی سربراہی میں جے آئی ٹی تشکیل دی جائے گی۔

اسلام آباد ہائی کورٹ میں حملے کے بعد وکلاء کی پکڑ دھکڑ اور ہراساں کرنے سے متعلق کیس کی سماعت چیف جسٹس اطہر من اللّٰہ نے کی۔

x
Advertisement

دورانِ سماعت چیف جسٹس اطہر من اللّٰہ نے کہا کہ آپ سب کو پتہ ہے کہ وہ کون لوگ تھے جنہوں نے یہاں حملہ کیا؟ میں نےخط لکھا ہے، اب ریگولیٹر کی جانب دیکھ رہے ہیں کہ وہ کیا کرتے ہیں، 70 سال سے کچہری کے لیے کچھ نہیں ہوا، اس حکومت نے کچہری کے لیے بہت کچھ کیا ہے، اس حکومت نے پی ایس ڈی پی سے کچہری منتقلی فنڈز کی منظوری دی، جس پر کام شروع ہونے والا ہے۔

انہوں نے کہا کہ ہم تو قانون ہی کا راستہ اختیار کر سکتے ہیں، حکومت ڈسٹرکٹ کمپلیکس پر کام کر رہی ہے، جو یہاں آئے تھے، سب وکیل تھے، باہر سے کوئی نہیں آیا تھا، آدھے سے زائد افراد کو میں جانتا ہوں، دونوں بار کے صدور کو کہا تھا کہ وہ یہاں آ جائیں لیکن وہ یہاں نہیں آئے۔

چیف جسٹس اطہر من اللّٰہ نے کہا کہ پولیس نے اس معاملے پر جے آئی ٹی بنانے کا فیصلہ کیا ہے، پولیس کے سینئر افسر کی سربراہی میں جے آئی ٹی تشکیل دی جائے گی، جنہوں نے تقاریر کیں، جنہوں نے انہیں ابھارا، ان کی نشاندہی بار کرے، جے آئی ٹی بار صدور سے بات کر لے، وہ نشاندہی کریں گے، احتجاج کی ضرورت نہیں تھی، چیف جسٹس بننے کے بعد سے میں نے کچہری کے لیے کام کیا ہے۔

یہ بھی پڑھیے

ہائیکورٹ پر حملہ 5 فیصد وکلاء نے کیا: چیف جسٹس اطہر من اللّٰہ

ان کا کہنا ہے کہ ہم پر وکلاء بحالی تحریک کے 90 شہداء کا قرض ہے، کوئی قانون سے بالاتر نہیں، 8 فروری کا واقعہ ناقابلِ برداشت ہے، تاہم کسی معصوم یا بے گناہ وکیل کو ہراساں نہ کیا جائے، جے آئی ٹی کے سربراہ ملوث عناصر کی نشاندہی کے لیے ڈسٹرکٹ بارز سے معاونت لیں، جو واقعے میں ملوث ہیں انہیں بھی فیئر ٹرائل کا موقع ملنا چاہیئے۔

اسلام آباد ہائی کورٹ نے کیس کی مزید سماعت 15 فروری تک ملتوی کر دی۔

قومی خبریں سے مزید