اب بھی عمران خان کا ٹائیگر ہوں، ڈی جے بٹ کی ضمانت منظور

لاہور کی مقامی عدالت نےپی ڈی ایم کے جلسے کیلئے ساؤنڈ سسٹم فراہم کرنے والے ڈی جے بٹ کو ضمانت پر رہا کر دیا ۔

ماڈل ٹاؤن پولیس نے ساؤنڈ سسٹم وینڈر ڈی جے بٹ کو مقامی عدالت میں پیش کیا، جہاں عدالت نے50 ہزار روپے کے ضمانتی مچلکوں کے عوض ڈی جے بٹ کو رہا کرنے کا حکم دے دیا۔

ڈی جے بٹ کا میڈیا سے گفتگو میں کہنا تھا کہ ان پر تشدد کیا گیا، یہ ظلم اور زیادتی ہے، وہ اب بھی عمران خان کے ٹائیگر ہیں۔

انہوں نے بتایاکہ جس اسلحہ کی برآمدگی کی بات کی جارہی ہے، اس کا لائسنس موجود ہے۔

واضح رہے کہ گزشتہ روز لاہور پولیس نے ڈی جے بٹ کو گرفتار کرکے اس کے خلاف کارِ سرکار میں مداخلت، پولیس سے ہاتھا پائی اور غیر قانونی رائفل رکھنے پر مقدمہ درج کیا تھا۔

2014 میں تحریک انصاف کے دھرنوں سے شہرت حاصل کرنے والے ڈی جے بٹ کو مینار پاکستان میں ہونے والے پی ڈی ایم کے جلسے میں ساؤنڈ سسٹم کی فراہمی کا ٹھیکہ ملا تھا۔

قومی خبریں سے مزید